Voetgangers, kinders, fietsryers en vragmotors

Baie van die mense wat op ons paaie sterf, was nooit in 'n motor nie. Voetgangers maak 'n groot deel van die padsterftes in Suid-Afrika uit, dikwels snags, naby taxistaanplekke, skole en besige hoofpaaie sonder sypaadjies. Baie mense het eenvoudig geen ander keuse as om langs vinnige verkeer te loop nie. As bestuurders moet ons hulle verwag, veral ná donker.

Ry stadiger naby skole en in woonbuurte, verwag dat mense sal oorstap waar daar geen oorgang is nie, en stop altyd vir 'n skolierpatrollie. Wanneer jy by 'n fietsryer verbyry, gee ten minste 1,5 meter spasie en wag totdat dit veilig is om verby te gaan. 'n Paar sekondes agter 'n fiets gaan nie jou dag bederf nie.

In die motor is die bestuurder daarvoor verantwoordelik dat elke passasier 'n veiligheidsgordel dra waar daar een is (regulasie 213). 'n Kind onder drie moet in 'n behoorlike karstoeltjie ry, selfs op 'n kort ritjie winkel toe. Dit ontstel my steeds elke keer as ek 'n kleuter tussen die voorsitplekke sien staan.

Vragmotors is 'n ander uitdaging. Hulle het baie meer ruimte nodig om te stop en te draai, en goederevoertuie swaarder as 9 000 kg mag nie vinniger as 80 km/h ry nie (regulasie 293), so beplan jou verbysteek vroegtydig en sny nooit voor een in nie. 'n Goeie reël: as jy nie die vragmotorbestuurder se spieëls kan sien nie, kan die bestuurder jou nie sien nie.