Oor Padvark
Padvark is 'n gemeenskapswebwerf waar Suid-Afrikaners swak bestuur rapporteer: deurry by stopstrate, rooi ligte, roekelose verbysteek en dies meer. Jy weet wie jy is.
Op hierdie bladsy
Wat Padvark is
Elke verslag, wat ons 'n voorval noem, wys foto's van die voertuig en sy nommerplaat, en soms 'n YouTube-video van wat gebeur het. Geregistreerde gebruikers dien voorvalle in, en 'n moderator hersien elkeen voordat dit publiek word.
Die gedagte is eenvoudig: wanneer swak bestuur sigbaar is, word dit minder aanvaarbaar. Padvark gee gewone padgebruikers 'n plek om dit op rekord te plaas, en laat almal sien watter voertuie telkens weer opduik.
Ons twee beginsels
- Privaatheid van oortreders. Geen gesigte van mense in voertuie mag ooit gewys word nie. Ons rapporteer voertuie en bestuursgedrag, nie mense nie. Inskrywings wat gesigte wys, word afgekeur of verwyder.
- Anonimiteit van rapporteerders. Rapporteerders word net met hul gebruikersnaam gewys. Regte name en e-posadresse word nooit vertoon nie, en ons verwyder alle metadata (soos GPS-ligging en toestelbesonderhede) uit opgelaaide foto's. Video's is skakels na YouTube, waar die rapporteerder dit self plaas.
Elke verslag word hersien
Niks verskyn op Padvark voordat 'n moderator dit nagegaan het nie. Ons kyk of die foto's 'n werklike verkeersoortreding wys, of die nommerplaat sigbaar is, of enige gesigte sigbaar is en of die beskrywing by die feite hou. Lees presies wat ons toelaat in ons inhoudreëls.
Wat Padvark nie is nie
Padvark is nie 'n wetstoepassingsagentskap nie en reik nie boetes uit nie. 'n Inskrywing is 'n verslag deur 'n lid van die publiek, nie bewys dat 'n oortreding begaan is of 'n bevinding teen enigiemand nie.
As jy wil hê die owerhede moet optree, kan jy die voorval ook by Arrive Alive en die RTMC aanmeld. Nadat jy 'n verslag ingedien het, berei ons alles voor wat jy vir hul vorm nodig het.
Moet nooit die reg in eie hande neem nie. Moenie iemand konfronteer, agtervolg of dreig oor iets wat jy op Padvark gesien het nie.
As ons 'n fout gemaak het
As jy glo 'n inskrywing is onakkuraat, of jy besit 'n voertuig wat op Padvark verskyn en wil 'n verslag betwis, gebruik die knoppie "Rapporteer hierdie inskrywing" op die inskrywing, of lees hoe versoeke om verwydering werk.